चैत्र २०, २०७२- सरकारले पूरै चक्रपथलाई विस्तार गरी ८ लेनको बनाइदिन चीन सरकारसमक्ष प्रस्ताव राखेको छ ।
कोटेश्वरदेखि सातदोबाटो हुँदै कलंकीसम्मको १० किलोमिटर खण्ड ८ लेनमा बनाइरहेको चीन सरकारलाई नेपालले पूरै चक्रपथलाई ८ लेनको बनाइदिन प्रस्ताव गरेको हो । कोटेश्वरदेखि कलंकीसम्मको विस्तार कार्य सकिएपछि चीनले कोटेश्वरदेखि चावहिल, नारायणगोपाल चोक, गोगबु, सितापाइदा हुँदै कलंकीसम्मसमेत ८ लेनको बनाइदिने जानकारी भौतिक पूर्वाधार यातायात मन्त्रालयका अधिकारीले दिए ।
‘हामीले ७/८ महिना अघि नै यो प्रस्ताव चीनलाई गरेका हौं । जवाफ आउन बाँकी छ । बाँकी चक्रपथसमेत चीनले ८ लेनको बनाइदिन्छ भन्नेमा हामी सकारात्मक छौं,’ सडक विभागका सहायक प्रवक्ता लक्ष्मीदत्त भट्टले भने ।
उनका अनुसार चीनले नै यसबारेमा प्रारम्भिक अध्ययन गरेको थियो । त्यसपछि सडक विभागले विस्तृत अध्ययन गरेर चीनसामु प्रस्ताव राखेको हो । १७ किलो मिटरलाई ८ लेनमा विस्तार गर्न करिब १३ अर्ब रुपैयाँ लाग्ने प्रस्तावमा रहेको भट्टले जानकारी दिए ।